MTUME NA NABII JOSEPHAT ELIAS MWINGIRA – KANISA LA EFATHA MWENGE.

Tunapozungumzia mwaka wa kumiliki, tunapaswa kugundua nani ndiye mmiliki. Biblia inasema, “Mbingu na nchi na vyote viijazavyo ni vya Bwana.” Ikiwa mmiliki ni Mungu, unapaswa kumjua YEYE na kuwa pamoja naye ili uweze kumiliki.

Mwingine pia anayeweza kukupa umiliki ni ibilisi, lakini yeye si mmiliki wa kweli; badala yake, yeye ni mwizi. Ibilisi huiba na kumiliki vitu vya wizi. Ikiwa wewe ni wa ibilisi, unaweza kumiliki, lakini utakuwa mwizi.

Msingi wa Jinsi Unavyopaswa Kuwa

1. Watu wa Mungu Wanamiliki Kile Kilicho cha Mungu
   Ili kumiliki kile Mungu alichonacho, yapaswa uwe na Mungu. Kuwa na Mungu kunahitaji kufuata kanuni na tabia zinazolingana na mmiliki.
   Tabia ya kiumbe chochote kilichoumbwa na Mungu lazima kiakisi sura ya Mungu. Kwa hivyo, kila kilichoumbwa na Mungu lazima kiwe na tabia na sura inayomuakisi Muumba wake. Yapasa ufanane na Mungu. Unafananaje? Ni kupitia tabia. Ni kupitia tabia pekee unaweza kufanana na Mungu.
2. Tabia Huundwa Kupitia Kanuni, Sio Maombi au Kufunga
   Kwa kufuata kanuni, unaunda sura ya Mungu ndani yako. Kanuni hazibadiliki; jinsi zilivyo, ndivyo zitakavyokuwa.
   • Kanuni hupunguza au kuondoa anguko: Ndiyo maana watu wenye nidhamu au adabu hawawezi kushindwa au kuanguka.
   • Kanuni haziwezi kubadilishwa: Kama unataka kuaminika na Mungu, jiweke katika kanuni. Mungu hawezi kumwamini mtu asiye aminika. Watu wenye nidhamu wanaweza kuaminika.
   • Vipaumbele ni msingi wa kanuni: Pasipo kuweka vipaumbele, huwezi kuishi kwa kanuni au nidhamu. Kwa maana hiyo, huwezi kuaminika na Mungu. Lazima ujifunge katika kanuni ili kuaminika na Mungu.
     Namna unavyothamini kanuni zako, ndivyo unavyolindwa dhidi ya uovu. Ishi kwa kanuni ili ulindwe.

   JIWEKEE KANUNI NA VIWANGO KATIKA MAISHA YAKO.
   Kuwa mtu wa kanuni huanza kwa kujiwekea viwango na kuzingatia hayo viwango. Mtu mkuu hatokei kama muujiza bali kupitia mchakato. Ukuu ni mchakato uliowekwa kama kiwango cha kuishi, hatua kwa hatua, hadi unapofikia ukuu. Jiwekee viwango katika maisha yako ikiwa unataka kufikia ukuu wako.

   Kujiwekea kiwango na kujitoa kwa ajili ya hicho kiwango kutakufanya uwe mtu mwenye kanuni. Kanuni hiyo itazalisha nidhamu inayohitajika kuijenga sura ya Mungu aliyoiumba ndani yako tangu mwanzo.

Kumwabudu Mungu Katika Roho na Kweli

Yohana 4:23 inasema, “Lakini saa inakuja, nayo sasa ipo, ambayo waabuduo halisi watamwabudu Baba katika roho na kweli; kwa maana Baba anawatafuta watu kama hao wamwabudu.”

Mungu anawatafuta waabuduo wa kweli. Nidhamu itakufanya uwe jinsi Mungu anavyokusudia uwe. Ni nidhamu, siyo tu kwenda kanisani au kucheza mbele za Mungu, itakayokufanya ufanane na Mungu.

Je, una nidhamu? Je, umejiwekea viwango katika maisha yako kama kanuni za kuishi?

Ukiri

“Moyo wangu na akili yangu sasa viko tayari kuweka viwango na kujidhatiti katika viwango hivyo ili kuwa mtu wa kanuni katika maisha yangu. Watu wenye tabia ya Mungu ni wale wenye uthamani, wanaojiwekea viwango katika maisha, na wanaojitoa kufanya mambo yenye thamani. Ni watu wa kanuni ambao hawabadiliki.”

Haijalishi unalia au unafunga kwa kiasi gani, maisha yako hayawezi kubadilika mpaka wewe umeamua kubadilika. Yohana 4:23 inasema, “Lakini saa inakuja, nayo sasa ipo, ambayo waabuduo halisi watamwabudu Baba katika roho na kweli; kwa maana Baba anawatafuta watu kama hao wamwabudu.”

Kuna watu wanamtafuta Mungu ili wamwabudu, lakini kuna watu ambao Mungu mwenyewe anawatafuta ili wamwabudu. Ni watu gani hao? Waabuduo wa kweli. Hawa ndio wanaoleta utukufu kwa Mungu. Watu wenye nidhamu na wanaoishi kwa kanuni ndio wanaobeba utukufu wa Mungu.

Maisha Bila Viwango

Maisha yasiyo na viwango au kanuni hayana mwelekeo. Utakuwa mtu asiye na jina. Lakini mtu wa kanuni na uthamani mara zote huanza kwa kujiwekea viwango na kanuni. Hicho kiwango au kanuni ndicho kitakachomwinua.

Ili kuwa mtu mkuu, huwezi kuruka hatua. Ni lazima ujiwekee kanuni na viwango ambavyo vitakusaidia kupanda ngazi hadi kufikia mahali pa ukuu. Hatua kwa hatua, unatoka kuwa mtu asiye na jina hadi kufikia mahali pa ukuu wako.

Namna unavyoongeza thamani kwa kuweka kanuni kwenye maisha yako, ndivyo unavyomletea Mungu utukufu. Ndiyo maana Mungu anawatafuta watu wa namna hiyo ili wamwabudu. Baada ya ibada, Mungu huwatia baraka.

Mchakato wa Ukuaji

Mungu anapokuona unatunza nidhamu kwa kufuata kanuni na viwango ulivyojiwekea, kwa namna unavyoweka vipaumbele vyako, Mungu anaendelea kukutazama na kukuwezesha kubeba utukufu wake. Siku baada ya siku, ukuaji hutokea maishani mwako, na hatimaye unafikia mahali pa ukuu wako.

Ujumbe huu na uwe chachu ya wewe kujiwekea kanuni na kuishi kwa viwango, ukijua kwamba kwa kufanya hivyo, unaakisi utukufu wa Mungu na kutimiza makusudi yake katika maisha yako.